Infos dernières

!عقلية سَكَّر

عقلية سَكَّر، شكون جامي فحياتو في هاد لبلاد، ما لقى لبيبان مغلوقة عليه بلا حتا سبة؟ نضن كامل عاناو من هاد العقلية تع سَكَّر.  تسألوني واش من علاقة مع السيارات؟ فالصح غاضتني بزاف عملية غلق و تفكيك مشارع و هيئات تركيب و بيع الطنوبيلات. علاش نسَكرو شركة ولا لوزين تخدَم عباد و توَّكل فاميليات كاملة، بلا ما نسييو نحسنو تسييرهم او نعاودو نهيئهم. صح التسيير تع هاد الشركات ما كانش نورمال، لكون الوضع الإقتصادي ماكانش نورمال، كان لازم على مالين الشركات يتأقلمو بهذا الوضع. المهم اليوم خسارا كبيرا راها صايرا فهاد المعامل و الشركات، يا ناس خلو الكفءات يتهلاو بها. و الكفاءات موجودة، لازم برك يتوفر الجو المناسب للخدمة.

هاد العقلية تع سَكَّر، دليل على نقص ذكاء  المسؤولين تاعنا. لأن لي ذكاء تاعو ضعيف معندوش القدرات الذهنية بش اريڨلي مشكل ما. يفضَل يسكَر بش يجتنب المشاكل، مع ان منصبه يتطلب منو بش يفكر باه يلقى الحل الأفضل لكل واحد. لكن مع الأسف هادا واش حلبت.

نعطيكم هنا بعض الأمثلة لعقلية سَكَّر نعيشوها كول يوم.

غلق الحدود هاد ليام ما عندها حتى معنى. بقينا غير احنا غالقين على رواحنا فيعوض المسؤولين يفكرو في حلول و إجراءات وقائية ذكية باش إخلو الناس تفواياجي على رواحها. و لكن ضعف فالتفكير و غياب الذكاء يدي غير لتَسْكار.

علابلكم بلي ممنوع عليكم تجيبو مل خارج ولا تملكو و لا تستعملو تيليسكوب او ليجومال، الا بترخيص من عدة وزارات أمنية و غير امنية؟ صايرا غير في بلادنا. هاد الأدوات المستعملة في اطار عام و علمي ممنوعة عندنا في 2020. عيش تشوف.

في عوض ينضمو استعمال الدرون كما في باقي البلدان، توعنا منعوه تلقائيا. عقلية سَكَّر.

نفحتلك دير مشروع تجاري ولا صناعي في مجال جديد غير موجود فالقائمة تع السجل التجاري، ما تقدرش، ايقولك مكاش عندنا. ما يخلو حتا مجال للإجتهاد باش اسهلو الأمور على المواطنين. خسارا.

نزيدلكم هادي الأخيرة، طروطوار لتحت الديوانة في تافورة، بالجزائر العاصمة، علاش ممنوع على المارة، لازم باه تجوز تحبط لطريڨ تع السيارات. عقلية سَكَّر كوم توجور. او زيد او زيد!

ايا نخليكم و ربي ايجيب الخير و ايجيب ناس عندهم اعقل باش يستعملوه.

Pour la version en français, cliquez-ici.

 

Laisser un commentaire

Votre adresse de messagerie ne sera pas publiée.